Sandmatt Wauwil
Sandmatt
D'Sandmatt lid im Wauwilermoos, am östliche Ufer vom ehemalige Wauwilersee. Die Siedlig isch 1965/1966 baut worde, als eini vo 4 Aussiedlige im Zug vo de Güeterzämeleggig in Wauwil. Am 8.August 1966 isch d Familie Müller vom Hinderdorf Wauwil mit 13 Persone id Sandmatt im Wauwilermoos züglet. Sit Generatione, mer munkled sit 1803, isch s Hinterdorf, respektive denn äbe später d'Sandmatt, in Familiebsitz. 1984 hed mine Papi de Hof vo sim Vater übernoh, 2015 han ich de Hof vo mine Eltere dörfe übernäh.
D'Sandmatt hed sich im Verlauf vo de Johre emmer weder veränderet. Aktuell heds uf de Felder Kunstwiese, Mais und Gerste. Sit 2022 hend öppe 10‘000 Erdbeeripflanze es Plätzli ide Sandmatt. Die Erdbeeri chansch du met all dine Fründe so im Juni früsch ab Feld cho Sälberpflücke. Meh Infos dezue finsch hier. Näbe de Erdbeeri hend ganz vöu Böim es dehei ide Sandmatt gfonde. D Baumnüss us de Sandmatt chasch du do oder bim Suter Beck kaufe. Oder du schribsch mer eifach e Nachricht, wenn no gern vo dem heimische Superfood möchtisch profitiere.
Üsi Wert
Fair
Mer isches wichtig, dass mini Mitarbeiter en faire Lohn hend sowie gueti und flexibli Arbeitsbedingige. Denn alleige wördi all das gar ned schaffe. Drom ou a dere Stell riese Danke all mine fliessige Hälfer.
Mer isches wichtig, dass allfälligi Produzente vo Rohstoff en guete Priis för ihri Vorarbeit a mine Produkt bechömed. Danke an Alli, wo met mer zäme schaffed ond ehre Teil zu de Produkt us de Sandmatt biträged.
Lokal
Mer isches wechtig, dass d Rohstoff us de nöchste Umgebig chömed und nome im Notfall uf Alternative usem Usland usgwiche werd. Sämtlichi Herkünft vo de Rohstoff werded klar deklariert. Absoluti Transparenz ond Ehrlichkeit gägeüber vom Chund esch mer wechtig.
Top Qualität und maximale Gnuss
Sämtlichi Läbensmittel us de Sandmatt hend e Top Qualität. Besch du trotzdem mal ned Iverstande met met em Inhalt, denn mäld dech bitte be mer. Ou üs cha mal e Fähler passiere ond Rückmäldige send sehr wertvoll zum no besser z werde.
Danke
A dere Stell (wills grad so passt):
Danke dass du bi mer Ikaufsch ond dodemet mech, mini Philosophie und mini Härzensprojekt unterstützisch. Vo Härze Danke.
Die hälfende Händ ide Sandmatt
Ganz vöu Lüüt unterstützed mich bim daily business ond träged tagtäglich zum guete Glinge vo all mine Projekt bi. A dere Stell es riese Danke mine "drüü Weise us Wauwil": Danke Papi, danke Alois und Franz. Danke für all üchi Ingenieurarbeit und guete Idee. Danke mim super Chrampficheib Sven für dini regelmässige Arbeitsisätz - zwüschedüre ou a dine freie Täg. Es riesegrosses Merci all mine Powerfraue, wo vor allem während de Erdbeerisaison emmer weder gwüssehaft zur Stell sind. Ond ou söscht hälfed, wenn Not a de Frau isch. Danke mim Mami, mine Schwöschtere wo eifach schnell do sind wenn alles anders lauft als plant. Danke mim Pensionäre-Team wo unregelmässig regelmässig do ond dete isprengt sowie allne wiitere, wo während intensive Ziite zur Stell send und eifach mal schnell mitapacked. Danke.
D'Erdbeerifee ond ihri Idee
Ech be d'Antonia, die stolzi Betrebsleiteri ide Sandmatt, d'Erdbeerifee im Wauwilermoos, gstudierti Agronomin, Grossflächedesigneri ond de kreativ Lockekopf hinder all dene Idee. Ursprünglich hani mal welle de Nobelpriis gwünne, denn aber igseh dass d'Grundlageforschig doch nid so mis Ding isch. Han denn de Wäg zrugg zu mine Wurzle gfonde. Ech han mi entschiede weder id Sandmatt z'go, dete häre wo mis Härz emmer dehei gsi isch. Jo, ond so hani 2016 d'Sandmatt vo mim Papi dörfe übernäh.
Mängisch bruchts e Krise im Läbe - es Hinterfroge vo bestehende Strukture ond dezue es paar Idee wo scho lang im Hinterkopf gschlummeret händ. So esch denn ou mis Erdbeerifeld zum Sälberpflücke entstande. Ech ha jo eigentli nie gern Erdbeeri gha, bis i wäge de Chind mal ofemne Erdbeerifeld zum Sälberpflücke glandet bin. Han denn mini Meinig gänderet, ond das e cheibe cooli Sach afo finde. Johrelang hani dra ome studiert, i minere Sandmatt ou so was z mache, aber irgendwie hed mer de Muet gfählt. Bis ebe denn eines Tages im 2021, woni beschlosse han, dass es do i üssere Region ou so es Selbstpflückfeld brucht. Jedes Jahr freu ich mich unglaublich of die erschte riife Erdbeeri. Möchtisch du de Moment ou nid verpasse? Denn träg dich doch im Newsletter i! Ond ich schriibe der sobald mini Erdbeeri rot werded.
Ond übrigens, ou usserhalb vo de Erdbeerisaison muesch du nid of die feine Wauwilererbeeri verzichte: du findsch sie in tröchneter und gfrührtröchneter Form, oder als Konfekt im Online Shop. Ond näbe de Erdbeeri händ mer, je nach Saison, anderi gfrührtröchneti ond tröchneti Frücht im Agebot. Wenn immer möglich gwachse ide Sandmatt, ond falls nid denn sicher us de nöchschte Umgebig.
Näbe de Erdbeeri händ ou ganz vöu Nussböim es dehei ide Sandmatt gfunde. Üsi Baumnüss chansch du tröchnet ganz oder scho offe bi mir im Shop oder ide Bäckerei Suter kaufe. Näbe de Baumnüss, han ich ou no Wiis-und Ruchmehl usem Wauwilermoos im Agebot. Us Weize gsäit met Freud, gwachse ganz ohni Pflanzeschutzmittel und Kunstdünger vor dinere Hustüüre, met Stolz geernted ond gmahle ide Ferrenmühle.
Ond wie das so isch mit vöu Idee, immer mal wieder geds was Neus. So händ mer de Herbst e chlini Parzelle Dinkel gsäit. Ou das gid de hoffentli im nöchschte Summer s Dinkelmehl usem Wauwilermoos. Und ab denn chani denn ou mini Dinkelpasta mit üsem eigete Getreide mache. Ebenso chömed vorussichtlich de Früehlig es paar Himbeeri und Brombeeri zu mir id Sandmatt. Ond ou Heidelbeeri wärdeds no paar Stöck meh. So dass mer denn so ab nöchstem Sommer üsi gfrührtröchnete Müeslibeeri ou als Beerimischig chönd abiete... Achja, ond ou no erwähne möchti mini Garte zum Sälberernte. Eis vo dene Herzensprojekt, woni grad kei Ahnig ha, ob du das cool findsch oder ned... Ond woni ou nonid so gnau weiss, wie's wiiter goht!
Es isch mir wichtig, dass mini Produkt under faire Arbeitsbedingige produziert wärded. Dass d'Rohstoff us de Sandmatt chömed, oder ganz lokal produziert worde sind. Ond, dass du weisch, woher d'Rohstoff für üsi Produkt chömed. Esse us de Sandmatt: fair, lokal und e maximale Gnuss!